Kwa maana ya Kidini, Twariqa ni mwenendo wa Ibada ulio bora, mwepesi na wa haraka zaidi wa kumfikia Mwenyezi Mungu (S.W). Kazi yake ni kushughulikia Ibada za Kiroho - kumfundisha Muislamu kumpenda sana Mwenyezi Mungu na Bwana Mtume Muhammad (S.A.W), kumuondoshea tabia mbaya kama kiburi, hasadi, ghadhabu na chuki, na kumjengea moyo safi wenye unyenyekevu, subira na mapenzi kwa Muumba na viumbe wenzake.

Ijaza ni njia rasmi ya kuipata Twariqa — aina ya ahadi (Mubayaa) anayoichukua Muridi mbele ya Sheikh wake ya kufungamana na Ibada ya Mwenyezi Mungu (S.W). Asili yake inatokana na tukio la Sayyidina Ali bin Abi Twalib (K.W) alipomuomba Bwana Mtume Muhammad (S.A.W) njia iliyo fupi, bora na nyepesi zaidi ya kumfikia Mwenyezi Mungu; akapewa jibu "Laa ilaha illa Llahu" kwa uongozi wa Sayyidina Jibril (A.S). Tangu wakati huo, Ijaza imekuwa ikitolewa mkono kwa mkono kutoka kizazi kimoja hadi kingine, hadi leo. Kwa maelezo zaidi kuhusu hali yako ya Ijaza, angalia sehemu ya Wasifu baada ya kujisajili.

Zawiya ni mahala maalum kwa ajili ya malezi ya Kidini, hasa kwa kumtaja na kumkumbuka Mwenyezi Mungu (Dhikr). Zawiya la kwanza katika historia ya Uislamu ni Pango la Hira (Makka), alipokuwa akidhikiri sana Bwana Mtume Muhammad (S.A.W) kabla ya kupewa Utume. Leo, neno Zawiya linatumika kuelezea mahali ambapo Muridi (wafuasi wa Twariqa) hukusanyika kwa ajili ya mafunzo na malezi ya Kidini.